Ураныг анх 1789 онд германы химич М.Г.Клапрот нээж, 1781 онд нээгдээд байсан нарны системийн нэгэн эрхэсийн нэрээр нэрлэжээ. Энэ үед зөвхөн ураны хатуу исэл UO₂ –ийн тухай мэдэж байсан бол 1841 онд Францын химич Е.М.Пелиго металл ураныг гаргажээ. 1870 онд Оросын эрдэмтэн Д.И.Менделеев ураны атом жин, дарааллын дугаарыг тодорхойлж, үелэх системийн 6-р группд хамааруулсан байна. 1896 онд Францын физикч А.Беккерель судлаж ураны давсанд агаар болон хатуу биетийг чөлөөтэй нэвтэрч гардаг туяа байгааг илрүүлжээ. 1899 онд Английн физикч Э.Резерфорд цацраг идэвхт туяануудыг судалж, альфа(α), бета(β), нилээд хожуу гамма(γ) цацраг гэж ангилжээ.

Уран ган шиг саарал өнгөтэй металл ба хувийн жин нь 19.05 г/см³, 1130⁰С–т хайлдаг. Химийн хувьд маш их идэвхитэй. Металлуудтай (мөнгөн ус, цагаан тугалга, зэс, хар тугалга г.м.) интерметалл нэгдэл үүсгэдэг, агаарт амархан исэлддэг. Гол онцлог нь байгалийн цацраг идэвхт чанартай. Ураны хэд хэдэн изотопын цөмийг нейтроноор үйлчилэхэд задарч маш их хэмжээний энерги ялгаруулдаг.

Уран байгальд өргөн тархалттай элемент бөгөөд А.П.Виноградовын тооцоолсноор дэлхийн царцдас дахь түүний кларк 0.00025%, боржинд 0.00035%, нефелин сиенитэд 0.001-0.003%, дундлаг найрлагатай чулуулагт 0.00018%, суурилаг чулуулагт 0.00005%. Олон фаазтай боржинлог чулуу үүсэхэд түүний эхний фазаас сүүлийн фаз руу ураны агуулга хэд дахин өсдөг байна.

1898 онд Францын эрдэмтэн П.Кюри гэр бүлийн хамт ураны давирхайнаас радийг гаргаж авчээ.1908 оноос радий гаргаж авахаар ураны хүдрийг олборлож эхэлсэн ба 1940 он гэхэд дэлхийн нийт олборлосон радийн хэмжээ 1 кг болж байсан гэдэг мэдээ байдаг.

Ураны гол эрдсүүд

Эрдсүүд:Найрлаганд нь уран орсон ойролцоогоор 200 гаруй эрдэс одоогоор мэдэгдэж байна. Эдгээрээс практикт ач холбогдолтой нь 25-30 эрдэс, харин томоохон үйлдвэрийн хүдрийн найрлаганд зөвхөн 12 ураны эрдэс ордог. Тэдгээрээс ихээхэн ач холбогдолтой нь гидротермаль ордод настуран, коффинит, уранинит ба ураны черни ховроор браннерит, давидит байдаг бол экзоген ордод ураны черни, карнотит, отенит ба торбернит байдаг. Мөн метаморф гаралтай ордод браннерит ба уранинит байдаг.