Оюутолгойд олон эрдэмтэн ажилладаг. Тэдний дотор С.Мягмарсүрэн, Р.Оюунцэцэг гэж ажил хэрэгч эрдэмтэн бүсгүйчүүд бий. С.Мягмарсүрэн ШУТИС-ийг геологийн зураглал, ашигт малтмалын эрэл хайгуулын мэргэжлээр, Р.Оюунцэцэг Хайгуулийн геологич мэргэжлээр бакалавр зэрэгтэй төгсцгөөжээ. С.Мягмарсүрэн ажлын гараагаа"КаскадиаМонголиа"компаниас эхэлж Сэлэнгийн Ерөө, Бугантын сав газарт алт, зэсийн хайгуул хийж байжээ. Өмнө нь оюутан байхдаа Галбын говьд Номгон, Хүрмэнтийн 1:200000 маштабын зураглал хийхэд оролцжээ.
Тэрбээр оюутан цагаасаа "Монголын хамгийн шилдэг геологичтой хамтран ажилласнаар эрэл хайгуулыг хэрхэн хийх талаар багагүй туршлага хуримтлуулж жинхэнэ геологич болох замаа олж авчээ. Дараа нь 'Харродс минералз" компанид ажиллаж, Баянхонгор аймгийн Шинэжинст сумын нутагт алт, зэс хайж явжээ. "Харродс минералз"-ыг Египетийн тэрбумтан Ал Файид үүсгэн байгуулсан юм байна. Түүнийг Монголд айлчлах үеэр нь уулзаж байснаа дурсч, "Их энгийн эелдэг хүн байна билээ" гэж өгүүлж байна. С.Мягмарсүрэн эрэл хайгуулын их ажлын завсар чөлөөгөөр "Өмнөговь аймгийн Мушгиа худгийн эффүзив чулуулгийн петрологи, геохими" сэдвээр магистр хамгаалаад авчээ. Тэр эрдэм шинжилгээний цөөнгүй өгүүлэл бичиж нийтлүүлсний зэрэгцээ эрдмийн ажлынхаа үр дүнг баталгаажуулахын тулд уулын баяжуулах "Эрдэнэт" үйлдвэр, "Айвенхоу майнз" зэрэг дэлхийд нэр хүндтэй компани болон Монгол-Канадын хамтарсан багаас хэрэгжүүлсэн цөөнгүй төсөлд идэвхийлэн оролцож байсан нь түүнд мэдлэг чадвараа сориход ихээхэн тус нэмэр болсон аж. С.Мягмарсүрэн ШУТИС-ийн геологи, газрын тосны сургуульд гурван жил судлаач зөвлөх багшаар ажиллаж, залууст геологийн шинжлэх ухааны нарийн ширийнийг таниулах ариун үйлсэд зүтгэжээ. Түүнийг хамт олон нь "Хос морьтой бүсгүй" гэж хэлдэг юм билээ. С.Мягмарсүрэн Япон оронтой, тэр дундаа Тохокү их сургуультай холбоотой ажилладаг аж. Япончуудын хойд нийслэл хэмээн нэрлэдэг Сэндай хотын Тохокү их сургууль бол Японд төдийгүй дэлхийд нэртэй сургууль гэгддэг. С.Мягмарсүрэн тус сургуульд "Өмнөд Монголын Хьюго Даммит Си-Аи -ны порфирын ордын хүдрийн эрдсийн парагенезис" сэдвээр магистрын зэрэг хамгаалж, дараа нь уг сэдвээ улам гүнзгийрүүлж, "Оюу Толгойн ордын флюид ормын судалгааг өмнөд Монголын Хьюго Даммит Си-Аи -ны порфирын ордын жишээн дээр" сэдвээр докторын зэрэг хамгаалжээ.
Р.Оюунчимэг 2003 онд Оюутолгойд анх ирж 20-иод өрөм нэгэн зэрэг хийж байсан бөгеөд тус ордын дэргэд минералогийн лаборатори байгуулсан нь ихээхэн ач холбогдолтой шийдэл болжээ. Урьд нь дээжээ Улаанбаатар дахь лаборатори луу явуулаад хариуг нь удаан хүлээдэг байсан бол одоо газар дээр нь минералогийн нарийвчилсан судалгааг богино хугацаанд хийдэг болжээ. Р.Оюунчимэг уул уурхайн хайгуулын үе шатанд Оюутолгой ордын худэржилт, хувирлыг судалсан олон жилийн судалгаан дээрээ түшиглээд эрдмийн зэрэг хамгаалжээ.
Тэрбээр "Оюутолгойн Хьюго Дамметтын зэс-алт порфирын ордын сульфидийн эвшил, алтны зүй тогтол" сэдвээр 2008 онд докторын зэрэг хамгаалсан төдийгүй дотоод, гадаадын олон улсын, тухайлбал: Чили улсад зохиогдсон "Let's Talk Ore Depostits" /SGА - 2011/, " Mongolia Mineral Exploration Round Up"/2012/ зэрэг хуралд илтгэл тавьж, хэвлэлд нийтлүүлж, Оюутолгойн ордыг олон улсад таниулах, оюутан залуусыг сургах үйлсэд их хувь нэмрээ оруулж яваа аж. Сүүлийн үед олон улсын хэмжээнд хүдрийг аль болох алдагдал багатай, өндөр бүтээмжтэйгээр баяжуулах талаар судлах байгаа бөгөөд геометалургийн судалгааны аргыг олон уурхай туршинд судалж байгаа ажээ.
Ийнхүү эрдэмтэн бүсгүйчүүд Оюутолгойд ажиллаж байна.