Өмнийн говьд Монгол бүү хэл дэлхийг алмайруулсан их баялаг нуугдаж байгаа нь нэгэнт ил болсон. Тэгвэл энэ их баялгаа бид үндэстэн дамнасан корпораци болох "Turquoise Hill”-д эзэмшүүлж, өөрсдөө хувь хүртэх нэрийдлээр зовлон тоочихыг нь сонсон, авсан зүйлгүй суугаа нь эмгэнэл. Гэтэл монгол газар нутгийг "Turquoise Hill” дур мэдэн худалдан борлуулж байна уу гэсэн хардлага салбарынхны дунд тархаад байна.

Учир нь, Канадын хөрөнгө оруулалттай "Turquoise Hill”-ийн охин компани болох "Оюутолгой” өөрсдийн 100 хувь эзэмшдэг Хармагтайн ордыг Австралийн хөрөнгө оруулалттай "Монгол металс” компанид худалдах гэж байгаа нь нэгэнт тодорхой болжээ. Монгол Монголдоо биш, харин канадууд авсраличуудад ийнхүү Монголын нэгэн томоохон зэс, молибдены болон алтны ихээхэн нөөцтэй ордыг шилжүүлж байна гэсэн үг. Угтаа бол Монголын төрөөс Цагаан суварга, Хармагтайн зэсийн ордуудыг Оюутолгой, Тавантолгойн дэд бүтэц сайжирсны дараа ашиглаж эхлэхэд таатай хэмээн төлөвлөж байсан ч ийнхүү тус ордыг 100 хувь эзэмшдэг "Оюутолгой” наймаагаа аль хэдийнэ хийгээд эхэлжээ.

Австралийн хөрөнгийн биржид бүртгэлтэй "Xanadu mines” Монголтой хамтарсан "Монгол металс” компаниар дамжуулан Хармагтайн ордыг авахаар 500 мянган ам.долларыг урьдчилсан төлбөр хэмээн шилжүүлжээ. Ингэхдээ "Оюутолгой” тус ордын 90 хувийг нь "Монгол металс”-т зарж байгаа бөгөөд үлдсэн 10 хувийг өөрсдөдөө үлдээж байгаа гэсэн үг. Нийт 14 сая ам.долларын наймаа ийнхүү урьдчилгаа төлбөр өгөлцөж, авалцсанаар нэгэнт эхэлж байгаа юм байна.

Ямартай ч хайгуулын үр дүнгээр маш өндөр чанарын алт, зэсийн нөөцтэй гэж тогтоогдсон, дотроо оюут улаан, шар чулуут хэмээх хоёр ордыг агуулж байдаг Хармагтайн орд ийнхүү зарагдаж байгаа аж. Төлбөрийн үлдэгдлийг нэг жил, зургаан сарын дотор "Оюутолгой” компанид бүрэн төлж дуусгахаа ч "Монгол металс” компанийн австрали захирал дуулгаад амжжээ. Өмнө нь япончууд, оросуудын сонирхлыг хүртэл багагүй татаж байсан Хармагтайн орд ийнхүү "Оюутолгой” компаниар дамжуулан дахин өөр гадны эзэнтэй монгол нэртэй компанид зарагдлаа.

 

 

Эх сурвалж www.wikimon.mn