"Алтан нар" Оюутолгойгоос хойш Монголд илэрсэн хамгийн ач холбогдолтой металлын ордоор нэр тодроод байна. Энэ тухай "Erdene Resource Development" компаниас гаргасан мэдэгдэлд дурдсан нь өдгөө олны анхаарлыг татаж эхэллээ.

Монголын уул уурхайн салбарыг шинэ түвшинд гаргаж, үр өгөөжөө өгнө хэмээн энэ салбарынханд найдлага төрүүлээд буй "Алтан нар" орд Баянхонгор аймгийн нутаг дэвсгэрт байрладаг. Өнгөрсөн жилийн наймдугаар сарын сүүлээр "Эрдэнэ Монгол" компани Баянхонгор аймгийн Шинэжинст сумын нутагт гурван хайгуулын талбайд өрөм тавьжээ. Тухайн үед тус компанийнхан Зуунмодын ордоос 211 мянган тонн молибден, 258.5 мянган тонн зэсийн нөөц илрүүлсэн байдаг юм. Дараа нь уг ордын ойролцоо Хувын хар хэмээх газарт зэсийн хайгуул хийж, өрөм тавьж байх үедээ Зуунмодын ордоос баруун тийш 40 км зайд "Алтан нар" хэмээх газарт алт, мөнгө, ховор металлын орд байгааг илэрүүлсэн гэнэ. Гэхдээ одоогийн байдлаар тус  ордод өрөм тавьж, нөөцийг нь тогтоохоор анхан шатны хайгуул хийгдэхээр болж байгаа хэмээн "Эрдэнэ Монгол" компанийн мэргэжилтнүүд өчигдөр хэлсэн.

Тэдний тайлбарласнаар "Алтан нар" орд нь 100 хувь Канадын хөрөнгө оруулалттай гэнэ. Тус компанийн ерөнхийлегч Петр Акерли "Хамгийн сүүлд явуулсан өрөмдлөг нь бидний итгэлийг улам нэмэгдүүлж байгаа. Тус орд Төв Азийн алтны бүслүүрт хамаарагддаг байхыг үгүйсгэхгүй. Тэгээд ч бидний ажлын эхний үр дүн төсөөлснөөс илүү сайн байгаа. Алтан нар төслийн ил уурхайн ажлыг эхлүүлэх боломжийг судалгааны үр дүн харууллаа. Дараа дараагийн үр дүнгүүд судалгааны ажлуудыг хаана, хэзээ хийхийг тодорхойлж өгнө" хэмээн байр сууриа илэрхийлээд байгаа.

Сонирхуулахад, тэд 4669 га газрыг эзлэн оршдог "Алтан нар" ордод жилийн өмнөөс хайгуул явуулсан гэж уул уурхайн салбарынхан хэлсэн. Өнгөрсөн хугацаанд дөрвөн цооногийн гурвынх нь дээжийг үнэлэхэд 400 метр урт хайгуулын газрын 250 метрээс тус бүрдээ 44-50 өргөнтэй судал олдсон гэнэ. Энэ нь дунджаар тн тутамт 1 грамм алт агуулагдаж буйг илтгэх гэнэ. Нарийвчилбал цооног тус бүрд 11-15 метрийн өргөнтэй судалд 2-4 грамм алт, 8-20 грамм мөнгө байгаа хэмээн мэргэжилтнүүд тайлбарлаж байна. Ийн "Алтан нар" орд Оюутолгойн дараа орохоор нөөцтэй болох нь тоггоогдоод буй аж.

Ч.АНУ