"Эрдэнэт” үйлдвэрийн Хүдрийн ил уурхайд уулын үзүүлэлтийн мэдээллийн нэгдсэн баазыг бий болгох, автоматжуулах "Майкромайн” программ нэвтрүүлэх ажил 70 хувьтай хэрэгжиж байна. Өнгөрсөн онд эхлүүлсэн уг ажлыг Хүдрийн ил уурхайн Маркшейдерийн товчоо Австралийн компанитай хамтран гүйцэтгэж байгаа юм. "Эрдэнэт” үйлдвэрийн технологийн тээвэр, уулын технологийн техникүүдэд сансрын хиймэл дагуулын тусламжтайгаар алсаас хянах диспетчерийн "ВИСТ” системийг нэвтрүүлж байна. "Майкромайн” программыг ил уурхайд 100 хувь нэвтрүүлснээр мэдээллийн автоматжуулалт сайжирч, хүдэр, уулын цул ачилт, хөрс хуулалтын хэмжээг өрмийн машин, экскаватор тус бүрээр ялган тооцоолох боломж бүрдэх юм. Мөн өндөр нарийвчлалтай GPS системийн программын тусламжтай Ил уурхайгаас Баяжуулах фабрикт өгч буй хүдрийн чанарын агуулга сайжрахад гол нөлөө үзүүлнэ гэж мэргэжилтнүүд үзэж байна.