Хүйтний улирал эхлэхтэй зэрэгцээд Налайх дүүргээс таагүй мэдээлэл хөвөрдөг. Уурхайг албан ёсоор хаасан хэдий ч тус дүүргийн иргэд гар аргаар, нууцаар нүүрс олборлож, хөдөлмөр хамгаалал, аюулгүй байдлаа хангаагүйгээс амиа алдлаа гэсэн мэдээ сонссон хэвлэлийнхэн тийш давхилдаж, мэдээлэл сурвалжлага бэлтгэн, албаныхан аймшигт ослын талаар ам уралдан ярьдаг байв. Тус уурхайд сүүлийн 10 жилд нийт 224 осол гарч, 190 хүн нас баран, 34 хүн хүнд бэртэж, 71 хүн хөдөлмөрийн чадвараа алдсан гэх судалгааг мэргэжлийн байгууллагынхан гаргажээ. Харин сүүлийн үед таагүй мэдээ дуулдахгүй нам жим байх болов. Энд тэндгүй нээсэн уурхайн ам цөөрч, амь насаараа дэнчин тавьдаг хүмүүсийн тоо, осол цөөрөв үү гэтэл үгүй аж.

 

 

Зөвшөөрөлтэй, зөвшөөрөлгүй амууд ажилласаар, осол гарч, хүний амь эрсэдсээр л байна. Монголд ганцхан байдаг Уул уурхайн аврах алба Налайх дүүрэгт бий. Тус албаны дарга С.Нямсүрэнгээс зарим зүйлийг тодрууллаа.

 

 

-Налайхад гар аргаар нүүрс олборлодог олон иргэн бий. Бүх амыг хаасан гэдэг ч нууцаар ажиллаад байгаа юм биш үү?

-Уурхайн 200 ам байснаас 100-г нь мэргэжлийн хяналтын байцаагчийн дүгнэлтийг үндэслэн хаасан. Одоо 100 ам ажиллаж, Налайх болон нийслэлийг нүүрсээр хангасаар байгаа.

-Хөдөлмөр хамгаалал, аюулгүй байдал хангагдааг үйгээс хүний нас хохирдог нь багассан уу?

-Өнгөрсөн онд 10 хүн нас барсан. Үүнээс зургаа нь үйлдвэрийн осол, дөрөв нь золгүй байдлаар амиа алдлаа. Он гараад нэг хүн нас барж, гурван хүний амийг манай албаныхан авраад байна.

2013, 2014 онд Налайхын уурхайд нас барсан иргэд

1 Иргэн Д-Налайх дүүргийн харьяат, 31 настай 2013.01.17

2 Иргэн Б-Налайх дүүргийн харьяат, 33 настай 2013.02.27

3 Иргэн Н-Налайх дүүргийн харьяат, 33 настай 2013.03.16

4 Иргэн Б-Налайх дүүргийн харьяат, 27 настай 2013.03.18

5 Иргэн Б-Налайх дүүргийн харьяат, 58 настай 2013.04.02

6 Иргэн У-Дархан-Уул аймгийн харьяат, 28 настай 2013.04.06

7 Иргэн Б-Налайх дүүргийн харьяат, 35 настай 2013.05.12

8 Иргэн Х-Хөвсгөл аймгийн харьяат, 30 настай 2013.10.26

9 Иргэн Г-Налайх дүүргийн харьяат, 23 настай 2013.11.15

10 Иргэн Б- Өвөрхангай аймгийн харьяат, 31 настай 2013.12.05

11 Иргэн А- Налайх дүүргийн харьяат харьяат, 38 настай 2014.01.07

Ийнхүү зуны зургаан сараас бусад үед уурхай ажилласаар, сар бүр нэг хүн алтан амиа цаг бусаар алдсаар байна.

 

 Х.ОЮУНСҮРЭН

 

http://mongolnews.mn/i/49152