БНХАУ дэлхийн хамгийн их нүүрсний нөөцтэй орны нэг. Одоогоор тогтоогдоод байгаа нөөц нь 5.9 их наяд тонн гэж мэдээлжээ. Нөөцийн энэ хэмжээг 2006-2013 оны судалгааны дүнд үндэслэн гаргасан хэмээн тус улсын Газар нутаг, байгалийн нөөцийн яамнаас мэдээлжээ.
Үүнээс одоогоор илэрчихээд байгаа 2,02 их наяд тонн нүүрсний нөөц нь нийт 428 400 кв.км газар нутгийн 2880 сав газарт байгаа аж.
Хятад улс нь эх орондоо ийм арвин нөөцтэй хэдий ч нүүрсний хэрэглээнийхээ нэлээдгүй хувийг импортоор хангахыг илүүд үзэж байгаа юм. Тухайлбал, тус улс 2013 онд 327 сая тонн нүүрс импортолсон нь өмнөх оныхоос 13 хувиар нэмэгдсэн үзүүлэлт болж байна. Үүний зэрэгцээгээр тэд сүүлийн жилүүдэд хилийн чанадад ирээдүйтэй уурхай худалдаж авахаар чармайж байна. Ялангуяа нүүрсний арвин нөөцтэй ОХУ-ын газар нутагт нүүрсний хайгуул идэвхтэй хийх болжээ. Хятадын төрийн өмчит "Чайна Шинхуа Энержи" групп "Лутянь" компанийн хувьцааны 50 хувийг худалдаж авснаар Оросын Зашуланск нүүрсний орд газарт олборлолт явуулах эрхтэй болжээ.Энэ төсөл нь 45 сая юань буюу 7,7 сая ам.доллараар үнэлэгдэж байна.