Уул уурхайн яамнаас зохион байгуулж буй "Эрдэс баялгийн салбар 2025” олон нийтийн хэлэлцүүлэг хурал энэ сарын 15-ны өдөр Best Western Priemer Туушин зочин буудлын Соёмбо зааланд зохион байгуулагдах талаар салбарын яам хэвлэлийн бага хурал хийлээ. Хэвлэлийн хуралд Уул уурхай яамны Төрийн нарийн бичгийн дарга Р.Жигжид, Стратегийн бодлого, төлөвлөлтиийн газрын дарга Ч.Отгочулуу, Сайдын зөвлөхүүд Ч.Түмэнбаяр, Д.Бат-эрдэнэ, Бодлогын хэрэгжилтийг зохицуулах газрын дарга Б.Батхүү, АМГ-ын дэд дарга Д.Үүрийнтуяа нар оролцож мэдээлэл өглөө.

Энэхүү хэлэлцүүлэг нь уул уурхайн салбарын талаар олон нийтэд бодит ойлголт өгөх, салбарын хөгжлийн хэтийн төлөв, бүтээмж ба өрсөлдөх чадварыг хэрхэн дээшлүүлэх, мөн 2025 он хүртэлх бодлогыг тодорхойлох зорилготой аж. Хэлэлцүүлэг нийт дөрвөн хэсэгтэй байх бөгөөд хуралдаанаас гарсан нийт зөвлөмжүүдийг нэгтгэсэн нэгдсэн хуралдаан, хэлэлцүүлэг болох юм. Хуралд Монгол Улсын Ерөнхий сайд Н.Алтанхуяг оролцох бөгөөд голлох илтгэлийг Уул уурхайн сайд Д.Ганхуяг "Эрдэс баялгийн салбарын эрх зүйн орчин ба хөгжлийн стратеги” гэсэн сэдвээр илтгэл тавих аж.

Харин салбар хуралдаанууд болох "Эрдэс баялгийн салбараас Монгол Улсын нийгэм, эдийн засагт үзүүлж буй нөлөөлөл”, "Эрдэс баялгийн салбар ба хүний эрх, хүрээлэн буй орчин”, "Эрдэс баялгийн салбар ба олон нийтийн оролцоо орон нутгйн хөгжил”, "Эрдэс баялгийн салбарын бүтээмж, өрсөлдөх чадвар” гэсэн сэдвүүдэд тус тус хэлэлцүүлэг болох юм. Эдгээр хэлэлцүүлгийн голлох илтгэлийг УИХ-ын гишүүн, Эдийн засгийн байнгын хорооны дарга Б.Гарамгайбаатар, УИХ-ын гишүүн, Байгаль орчин, хүнс, хөдөө аж ахуйн байнгын хорооны дарга Г.Баярсайхан, "Энержи Ресурс” ХХК-ийн гүйцэтгэх захирал Г.Батцэнгэл, Монголын экспортлогчдын холбооны ерөнхийлөгч Д.Галсандорж нар салбар хуралдааны илтгэлүүдийг тавих юм. Энэхүү хурлыг салбарын яам анх удаа зохион байгуулж байгаа бөгөөд жил бүр тогтмол тус хурлыг зохион байгуулахаар төлөвлөж байгаа ажээ. Мөн энэ удаагийн хуралд хувийн хэвшил, хэвлэл мэдээллийн байгууллага, иргэний нийгэм, аймаг орон нутгийн удирдагууд, төрийн байгууллага гэсэн төлөөлийг нээлттэй оролцуулж уриалга гаргаж, санал асуулгыг авч байгаа юм байна. Санал асуулгыг вэб сайтаас авч байгаа бөгөөд хурлын өмнөх өдөр санал асуулгын дүнг гаргаж хэлэлцүүлэгт танилцуулж Төрөөс эрдэс баялгийн салбарт баримтлах бодлогод тусгах юм байна. Хэрэв та санал асуулгыг бөглөхийг хүсвэл www.mm.gov.mn, www.mining.mn сайтуудын санал асуулга гэсэн хэсэгт байрлах 19 асуудлын талаах саналыг бөглөх боломжтой ажээ.