Төр-хувийн хэвшлийн түншлэлийг сайжруулах ажлын хүрээнд Байгаль орчин, ногоон хөгжлийн яам, Монголын алт үйлдвэрлэгчдийн холбоотой хамтран ажиллах "Санамж бичиг”-ийг өчигдөр байгуулав.

Энэхүү санамж бичгийг уул уурхайн салбарт байгаль орчныг хамгаалах, нөхөн сэргээх, байгаль орчинд ээлтэй, дэвшилтэт технологийг нэвтрүүлэх чиглэлээр төрийг төлөөлж БОНХЯ-ны Хүрээлэн буй орчин, байгалийн нөөцийн газрын дарга Д.Энхбат, хувийн хэвшлийг төлөөлж Монголын алт үйлдвэрлэгчдийн холбоо ТББ-ын тэргүүн Т.Ганболд нар гарын үсэг зурлаа. Санамж бичгийг Уул уурхайн яамнаас шинээр боловсруулж буй "Монгол алт” хөтөлбөрт байгаль орчинтой холбогдсон урт хугацааны зорилт, үр дүн, хариуцлага, хяналт, ил тод байдлын тогтолцоог сайжруулах зорилтыг тусгуулж, амжилттай хэрэгжүүлэх, улмаар Талууд цаашдын хамтын ажиллагааг өргөжүүлэх зорилгын дор байгуулж байгаа юм.

Санамж бичигт Талууд дараахи чиглэлээр хамтран ажиллахаар тусгажээ. Үүнд:
- Талууд алт олборлох төслийн байгаль хамгаалал, нөхөн сэргээлтийн өнөөгийн байдалд судалгаа, дүн шинжилгээ хийж дүгнэлт гаргасны үндсэн дээр шинээр боловсруулж буй "Монгол Алт” хөтөлбөрийн баримт бичигт байгаль хамгаалал, нөхөн сэргээлтийн хариуцлага, хяналт, ил тод байдлын тогтолцоог нэвтрүүлэх урт хугацааны зорилт, түүнийг хэрэгжүүлэх арга хэмжээ, гарах үр дүнг боловсруулахад хамтран ажиллана.
- Талууд алт олборлох төслийн байгаль орчны нөхөн сэргээлтийг сайжруулах зорилгоор талуудын хяналт, үнэлгээ, олон нийтийн оролцоог нэмэгдүүлэхэд хамтран ажиллах болно.

- Холбоо нь байгаль орчин, ногоон хөгжлийн яамны зүгээс гарч буй бодлого, эрх зүйн акт, шийдвэр, байгаль орчин ээлтэй дэвшилтэт технологийг гишүүд болон олон нийтэд таниулан сурталчилж, хэрэгжилтэнд дүгнэлт гаргаж талуудад танилцуулна.
-  Талууд алт хайх, олборлох, баяжуулах үйл ажиллагаанд байгаль орчинд ээлтэй, олон улсын стандартад дүйцэхүйц дэвшилтэд технологи, тоног төхөөрөмжийг  нэвтрүүлэхэд холбогдох стандартыг шинээр болон шинэчлэн боловсруулахад хамтран ажиллана гэжээ.
Санамж бичиг нь 3 жилийн хугацаанд хэрэгжих бөгөөд жил бүр хийж  хэрэгжүүлэх ажлын нарийвчилсан төлөвлөгөө гаргаж, хамтын ажиллагааны гэрээг дүгнэх юм байна.

Н.Туяа

MONTSAME