Иргэн, нөхөрлөл, аж ахуйн нэгж, байгууллага нь мод бэлтгэсэн талбай, ойн түймэр, хөнөөлт шавж болон бусад байгалийн гамшигт өртөгдсөн талбайд мод тарьж ургуулбал төр худалдан авч, улсын ойн санд шилжүүлэх боломжтой болжээ.

Усны ундарга, гол мөрнийн эх, эрэг дагуу болон баян бүрдийг хамгаалах зорилгоор тарьж ургуулсан ой ч үүнд хамаарах аж.

Хэрвээ иргэн, байгууллага өөрийн хөрөнгөөр тарьж ургуулсан ойгоо худалдахаар бол хүсэлтээ сум, дүүргийн Засаг даргадаа гаргасны дагуу таны таримал ойд тооллого явуулж, чанар үр дүнг нь шалгаад худалдан авах, эсэх тухай акт үйлдэх юм байна.

Харин иргэн, байгууллагын худалдах гэж буй таримал ойн талбай нь 05 га-гаас багагүй, үр ба тарьц, суулгацаар ойжуулалт хийснээс хойш 5-аас дээш жил арчилж ургуулсан, 8 ба түүнээс дээш настай байх зэрэг шалгууртай аж.  

Ойт хээрийн бүсэд 0.5 га-д 700, тал хээрийн бүсэд 500, говь цөлийн бүсэд 300-гаас багагүй ширхэг мод тарьсан байж та худалдах боломжтой болох юм. Үнийн хувьд 1 га таримал ойг 1 сая төгрөгөөр үнэлжээ. Гэхдээ модны төрөл, тоо болон ямар бүсэд тарьснаас шалтгаалан үнийн хэлбэлзэл өөр өөр байна.

Өөрөөр хэлбэл,  модны төрөл, тоогоор  ангилж итгэлцүүрийн үнэ гаргасан бөгөөд жодоо, тоорой, жигд, сухай зэрэг үнэт үйлдвэрийн модны 1 га дахь тарималыг 1.5 сая, бут сөөгийг 900 мянган төгрөгөөр төр худалдаж авах юм. Худалдах таримал ойн 0.5 га дахь модны хамгийн бага тоо нь 300 ширхэг байх бөгөөд үүнээс олон болох тусам худалдах үнэ нь өсөхөөр журамд заажээ.